Soliq xizmati organlarida korrupsion huquqbuzarliklarning oldini olish, sabab bo‘luvchi omillarni bartaraf etish hamda jamoada korrupsiyaga nisbatan murosasiz munosabatni shakllantirish maqsadida “Korrupsiyaga qarshi birgalikda kurashamiz” shiori ostida Surxondaryo viloyati soliq xodimlarining yaqin qarindoshlari ishtirokida uchrashuv o‘tkazildi.

Davlat xizmatchisi, xususan soliq xodimi bo‘lish naqadar sharafli va mas’uliyatli kasb ekanligini ta’kidlanib, iqtisodiyotimiz rivoji, mamlakat taraqqiyoti yo‘lida xizmat qilayotgan soliq xodimlarini har tomonlama qo‘llab-quvvatlab kelayotgan oila-a’zolariga minnatdorchilik bildirildi. 

Mavjud korrupsiyaviy xavf-xatarlarning oldini olish, farzandlari va yaqinlarini bu xavfli illat tuzog‘iga tushishdan asrash uchun jamoada ham oilada ham korrupsiyaga nisbatan murosasiz munosabatni shakllantirishning muhim ahamiyati tushuntirildi.

Shuningdek, viloyat soliq xizmati organlarida samarali mehnat qilib kelayotgan bir guruh soliq xodimlarining ota-onalari, turmush o‘rtoqlari va yaqin qarindoshlariga viloyat soliq boshqarmasi boshlig‘ining tashakkurnomalari topshirilib,  soha rivojidagi fidoyi mehnatlari alohida e’tirof etildi.

-  O‘g‘lim soliq tizimida mehnat qilayotganidan doimo faxrlanib yursamda, lekin bu kasbning mas’uliyatini to‘liq his qilmagan ekanman”, - deydi Bandixon tumani soliq inspeksiyasi xodimi Zafar O‘roqovning onasi Oyimxol O‘roqova. – To‘g‘ri hamma kasbning o‘ziga yarasha qiyinchiligi, mashaqqati bo‘ladi, ammo soliq xodimining mas’uliyati, yurt rivoji yo‘lidagi zahmatli mehnati naqadar muhimligini bugungi uchrashuvda angladim. Shu bilan birga shunday sharafli va mas’uliyatli kasbidan qadr topib, mehnati olqishlanganligidan, farzandimiz ortidan biz ota-onalar rahmat eshitganimizdan juda ham quvondim.

Darhaqiqat yurt koriga kamarbasta farzandlarni voyaga yetkazish va ularning ortidan yaxshi gaplar eshitishdanda yuksakroq baxt bo‘lmasa kerak.

Surxondaryo viloyati soliq boshqarmasi