Norezidentlarga soliq solish 

O‘zbekiston Respublikasidagi norezident doimiy muassasasining umumiy xususiyatlari

- chet el yuridik shaxsi O‘zbekiston Respublikasidagi tadbirkorlik faoliyatini to‘liq yoki qisman amalga oshirish uchun doimiy faoliyat joyi mavjudligi;

- chet el yuridik shaxsni xodimlarining O‘zbekistonda bo‘lish davriyligi.

Faqat tayyorgarlik yoki yordamchi faoliyat turlari doimiy muassasani tashkil etishga olib kelmaydi.

Doimiy muassasani hisobga qo‘yish

Doimiy muassasa, faoliyatni amalga oshirish boshlangan kundan e’tiboran bir yuz sakson uch kalendar kundan kechiktirmay soliq organiga soliq to‘lovchi sifatida hisobga qo‘yish to‘g‘risidagi arizani taqdim etishi shart.

Agar bir yuz sakson uch kalendar kundan ortiq muddatga shartnoma tuzgan bo‘lsa, soliq to‘lovchi sifatida hisobga qo‘yish to‘g‘risidagi ariza mazkur faoliyatni amalga oshirish boshlangan sanadan o‘ttiz kalendar kundan kechiktirmay soliq organiga taqdim etiladi.

Doimiy muassasaga soliq solishning xususiyatlari 

Doimiy muassasasa tashkil topganda soliq majburiyatlari norezident tomonidan mustaqil bajariladi.

-Foyda solig‘i 15% miqdorda, sof foydaga solinadigan soliq (dividendga) *10% miqdorda;

-Ijtimoiy soliq mehnatga haq to‘lash fondidan 12% miqdorida;

- Xodimlarning oylik maoshlaridan:

 Jismoniy shaxslardan olinadigan daromad solig‘i 12% miqdorida;

 Shaxsiy jamg‘arib boriladigan pensiya badallari (ShJPB)- 0,1%.

Doimiy muassasa o‘z xodimlari kesimida ish beruvchi sifatida soliq agenti hisoblanadi, ya’ni xodimlarning oyligidan tegishli soliq to‘lovlarini ushlab qolib, byudjetga to‘lab beradi.

- Qo‘shilgan qiymat solig‘i 12% miqdorida;

-Aksiz solig‘i - aksizosti tovarlar (xizmatdar) bo‘yicha soliq stavkalari Soliq kodeksining 289¹, 289² va 289³-moddalarida belgilangan.

Mol-mulk solig‘i

Noturar ob’ektlar- 1,5%

Normativ muddatlarda qo‘rilishi tugallanmagan ob’ektlarga nisbatan- 3%

Alohida toifadagi mulklar uchun - 0,6% (saqlashdagi ko‘chmas mulk ob’ektlari, temir yo‘llar,magistral va boshqalar).

- Yer solig‘i– qishloq xo‘jaligi uchun mo‘ljallanmagan yerlar bo‘yicha bazaviy soliq stavkalari respublika hududlari kesimida 1 gektar uchun soliq stavkalari Soliq kodeksining 429-moddasida belgilangan.

- Suv resurslaridan foydalanganlik uchun soliq– belgilangan limit doirasida yer usti va yer osti manbalaridan olinadigan suv resurslari uchun soliq stavkalari mutlaq miqdorda bir kub metr uchun soliq stavkalari Soliq kodeksining 445-moddasida belgilangan.

- Yer qa’ridan foydalanganlik uchun soliq – foydali qazilmalar guruhisoliq kesimida stavkalari Soliq kodeksining 452-moddasida belgilangan.

*Doimiy muassasa orqali faoliyatini amalga oshiruvchi norezident dividendlar tarzidagi daromadlar boʻyicha Oʻzbekiston Respublikasining xalqaro shartnomasida nazarda tutilgan pasaytirilgan soliq stavkasini Soliq kodeksning 357-moddasida koʻrsatilgan tartibda qoʻllashga haqli.

Norezident daromadi tarkibiga nimalar kiradi?

O‘zbekiston Respublikasidagi iqtisodiy faoliyatdan olingan daromadlar hamda O‘zbekiston Respublikasining yurisdiksiyasi, huquq layoqati va (yoki) uning davlat organlari va iqtisodiy munosabatlarning boshqa sub’ektlari bilan iqtisodiy munosabatlarga bevosita bog‘liq bo‘lgan boshqa daromadlar O‘zbekiston Respublikasidagi manbalardan olingan daromadlar jumlasiga kiradi.

Norezident daromadi tarkibiga nimalar kirmaydi?

1) faqat tashqi savdo operatsiyalarini amalga oshiruvchi shaxs nomidan va uning manfaatlarini ko‘zlab amalga oshirilgan hamda faqat O‘zbekiston Respublikasida tovar sotib olish yoki O‘zbekiston Respublikasi hududiga tovar olib kirish bilan bog‘liq tashqi savdo operatsiyalaridan olingan daromadlar.

2) O‘zbekiston Respublikasidan tashqarida xizmatlar ko‘rsatishdan olingan daromadlar (SKning 351-modda ikkinchi qismda ko‘rsatilgan daromadlar mustansno).

Soliqni kim to‘laydi?

Soliq norezidentga daromad to‘lovchi soliq agenti tomonidan hisoblab chiqariladi va ushlab qolinadi.

Soliqning ushlab qolinishi soliq to‘lovchining daromadlaridan bunday daromadlarning har bir to‘lovi paytida amalga oshiriladi.

Xalqaro shartnomani qanday qo‘llash mumkin?

Soliq agenti norezident tomonidan quyidagi hujjatlar taqdim etilgan taqdirda norezidentga daromad to‘lashda xalqaro shartnomalar qoidalarini mustaqil ravishda qo‘llash huquqiga ega:

- soliq rezidentligini tasdiqlovchi hujjat (daromadni to‘lash sanasidan kechiktirmay);

- ushbu tashkilot bunday daromadlarni (dividendlar, foizlar, royalti) olish uchun tegishli huquqqa ega ekanligini tasdiqlovchi hujjat.

Muhim! Soliq summasi ushlab qolinmaganda yoki O‘zbekiston Respublikasining xalqaro shartnomalari qoidalari g‘ayriqonuniy ravishda qo‘llanilganda, bu soliqning ushlab qolinmasligiga yoki to‘liq ushlab qolinmasligiga sabab bo‘lsa, soliq agenti ushlab qolinmagan soliq summasini va tegishli penya summasini byudjetga kiritishi shart.

Soliq hisoboti qachon beriladi?

Norezidentlarning daromadlaridan olinadigan soliq summalari bo‘yicha soliq hisoboti soliq agenti tomonidan o‘zi soliq hisobiga qo‘yilgan joydagi soliq organiga daromadlar to‘langan oydan keyingi oyning yigirmanchi kunidan kechiktirmay taqdim etiladi.