Oʻzbekiston Respublikasi Prezidentining 2024-yil 23-dekabrdagi “Qoʻqon texnoparki” maxsus sanoat zonasini tashkil etish toʻgʻrisida”gi 876-sonli qaroriga asosan Fargʻona viloyati Uchkoʻprik tumanida “Qoʻqon texnoparki” sanoat zonasi  tashkil qilinmoqda.

Qarorning 7-bandiga asosan:

“Qoʻqon texnoparki” maxsus sanoat zonasi hududida Maxsus sanoat zonasi ishtirokchilariga “Oʻzbekiston Respublikasi Maxsus sanoat zonalari toʻgʻrisida”gi Qonuni va Oʻzbekiston Respublikasi Soliq kodeksiga asosan maxsus iqtisodiy zonalar ishtirokchilari uchun joriy etilgan soliq va bojxona imtiyozlari tatbiq etilishi;

Shuningdek, Vazirlar Mahkamasining 2021-yil 4-iyundagi 352-son qarori bilan tasdiqlangan Oʻzbekiston Respublikasi hududiga import qilishda bojxona boji va qoʻshilgan qiymat soligʻidan ozod etiladigan, respublikada oʻxshashi ishlab chiqarilmaydigan  texnologik asbob-uskunalar  roʻyxatiga muvofiq imtiyozlar tatbiq etilish koʻzda tutilgan.

Soliq kodeksining 473-moddasiga asosan Maxsus iqtisodiy zonalarning ishtirokchilariga kiritilgan investitsiyalar hajmiga qarab, mol-mulk soligʻidan, yer soligʻidan va suv resurslaridan foydalanganlik uchun soliqdan Oʻzbekiston Respublikasi Prezidentining qarori bilan belgilangan muddatga ozod qilish tarzida soliq imtiyozlari beriladi.

Maxsus iqtisodiy zonalarning ishtirokchilari foyda soligʻini toʻlashdan oʻzi kiritgan investitsiyalar hajmiga qarab:

3 million AQSH dollaridan 5 million AQSH dollarigacha boʻlgan miqdordagi investitsiyalar uchun — 3 yil muddatga;

5 million AQSH dollaridan 15 million AQSH dollarigacha boʻlgan miqdordagi investitsiyalar uchun — 5 yil muddatga;

15 million AQSH dollari va undan yuqori miqdordagi investitsiyalar uchun — 10 yil muddatga ozod etiladi.

Ushbu soliq imtiyozlari faqat investor (investorlar) va Maxsus iqtisodiy zona direksiyasi oʻrtasida tuzilgan Maxsus iqtisodiy zona hududiga investitsiya kiritish toʻgʻrisidagi bitimda nazarda tutilgan maxsus iqtisodiy zona ishtirokchisining faoliyati turlariga nisbatan tatbiq etiladi.

Soliq solish metodologiyasi departamenti